नयाँ दिल्ली ।

भारतीय प्रधानमन्त्री नरेन्द्र मोदी ले पुनर्निर्मित सोमनाथ मन्दिर को लोकार्पण भएको ७५ वर्ष पूरा भएको अवसरमा आगामी मे ११ मा पुनः सोमनाथ पुग्ने बताएका छन् ।देशवासीका नाममा लेखिएको सन्देशमा मोदीले सोमनाथ केवल एउटा मन्दिर नभई भारतको “अदम्य सभ्यतागत चेतना र आत्मसम्मान” को प्रतीक भएको उल्लेख गरेका छन् । उनले सोमनाथको इतिहासलाई “विध्वंसबाट सृजनतर्फको यात्रा” भन्दै वर्णन गरेका छन् । मोदीले सन् २०२६ को सुरुवातमै “सोमनाथ स्वाभिमान पर्व” मा सहभागी हुन सोमनाथ गएको स्मरण गर्दै अब मे ११ मा पुनर्निर्मित मन्दिर उद्घाटनको ७५औँ वर्षगाँठ मनाउन पुनः त्यहाँ पुग्न लागेको बताएका छन् । उक्त मन्दिर सन् १९५१ मा भारतका प्रथम राष्ट्रपति राजेन्द्र प्रसाद द्वारा उद्घाटन गरिएको थियो । प्रधानमन्त्री मोदीले सोमनाथको पुनर्निर्माणमा सरदार वल्लभभाई पटेल, के. एम. मुन्शी लगायतका व्यक्तित्वहरूको योगदान स्मरण गरेका छन् । उनले स्वतन्त्रतापछि भग्नावशेषमा पुगेका पटेलले सोमनाथ पुनर्निर्माणको संकल्प गरेको उल्लेख गर्दै त्यो अभियानमा सम्पूर्ण भारतले साथ दिएको बताएका छन् । मोदीले आफ्नो लेखमा सोमनाथमाथि पटक–पटक आक्रमण भए पनि भारतीय सभ्यताको आत्मबल कहिल्यै नटुटेको उल्लेख गरेका छन् । “जति ठूलो आँधी आए पनि फेरि उठ्ने शक्ति हाम्रो सभ्यतामा छ,” उनले बताएका छन् । यसअघि जनवरी ८ देखि ११ सम्म आयोजित “सोमनाथ स्वाभिमान पर्व” ले सोमनाथमाथि भएको पहिलो आक्रमणको १,००० वर्ष पूरा भएको अवसरलाई पनि स्मरण गरेको थियो ।

काठमाडौं । अमेरिका र इरानबीचको तनाव फेरि चर्किएको छ । अमेरिकाले इरानका सैन्य ठेगानामाथि बमबारी गरेको दाबी गरेको छ भने इरानले त्यसअघि अमेरिकी पक्षबाट युद्धविराम उल्लंघन भएको आरोप लगाएको छ ।

अमेरिकी पक्षका अनुसार होर्मुज जलडमरूमध्य क्षेत्रमा अमेरिकी नौसैनिक जहाजमाथि इरानले मिसाइल, ड्रोन तथा साना डुंगामार्फत आक्रमण गरेपछि आत्मरक्षाका लागि जवाफी कारबाही गरिएको हो ।

युनाइटेड स्टेट्स सेन्ट्रल कमान्ड (सेंटकॉम) ले जारी गरेको वक्तव्यमा अमेरिकी नौसेनाका गाइडेड मिसाइल डिस्ट्रोयर ओमानको खाडी तर्फ गइरहेका बेला इरानी सैन्य बलले हमला गरेको उल्लेख गरिएको छ । त्यसपछि अमेरिकी सेनाले आक्रमण रोकेर जवाफी कारबाही गरेको दाबी गरिएको छ ।

यसअघि अमेरिकी राष्ट्रपति डोनाल्ड ट्रम्प ले इरानसँगको युद्ध चाँडै अन्त्यतर्फ जाने बताएका थिए । तर पछिल्लो घटनाले क्षेत्रीय तनाव थप बढाएको देखिएको छ ।

यता इरानले भने अमेरिका स्वयंले युद्धविराम तोडेको आरोप लगाएको छ । इरानको सरकारी प्रसारण संस्था आईआरआईबी का अनुसार होर्मुज जलडमरूमध्यतर्फ गइरहेको एक इरानी तेल ट्यांकरमाथि अमेरिकी आक्रमण भएपछि इरानले मिसाइल प्रहार गरेको हो ।

इरानको शीर्ष सैन्य कमान्डले अमेरिकी कदमलाई “युद्धविराम उल्लंघन” भनेको छ । मध्यपूर्वको सबैभन्दा संवेदनशील सामुद्रिक मार्ग मानिने होर्मुज जलडमरूमध्य मा बढ्दो सैन्य गतिविधिले विश्व बजार, विशेषगरी तेल आपूर्तिमा असर पर्ने चिन्ता बढेको छ ।

काठमाडौं । अख्तियार दुरुपयोग अनुसन्धान आयोग ले पोखरा क्षेत्रीय अन्तर्राष्ट्रिय विमानस्थल निर्माणमा भएको भनिएको अनियमितता प्रकरणमा पूर्वअर्थमन्त्री ज्ञानेन्द्रबहादुर कार्की सहित १४ जनाविरुद्ध भ्रष्टाचार मुद्दा दायर गरेको छ ।

आयोगले बिहीबार विशेष अदालतमा दायर गरेको मुद्दामा पूर्वअर्थसचिव शंकर अधिकारी, पूर्वसचिवहरू केवल भण्डारी, महेश्वर न्यौपाने, सुरेश आचार्य, बहालवाला सचिव डण्डुराज घिमिरे, नेपाल नागरिक उड्डयन प्राधिकरणका तत्कालीन महानिर्देशकहरू प्रदीप अधिकारी र सञ्जीव गौतम लाई पनि प्रतिवादी बनाइएको छ ।

यसैगरी विमानस्थल निर्माणमा संलग्न चिनियाँ कम्पनी सीएमसी र त्यसका प्रतिनिधिविरुद्ध समेत मुद्दा दायर गरिएको आयोगले जनाएको छ ।

पोखरा क्षेत्रीय अन्तर्राष्ट्रिय विमानस्थल निर्माण प्रक्रिया, ठेक्का व्यवस्थापन, लागत निर्धारण तथा ऋण उपयोगमा अनियमितता भएको आरोप लामो समयदेखि उठ्दै आएको थियो । आयोगले अनुसन्धानपछि सार्वजनिक पदको दुरुपयोग गर्दै राज्यलाई हानि पुर्‍याइएको निष्कर्षसहित विशेष अदालतमा भ्रष्टाचार मुद्दा दायर गरेको हो ।

यो प्रकरणलाई नेपालको पूर्वाधार विकाससँग जोडिएको पछिल्लो ठूलो भ्रष्टाचार मुद्दाका रूपमा हेरिएको छ ।