बुद्ध एयरको ATR-72 (9N-AJO) विमानलाई बिदाइ, अब उडान नगर्ने

बुद्ध एयरको ATR-72–500 सिरिजको 9N-AJO दर्ता नम्बर भएको विमानलाई औपचारिक रूपमा बिदाइ गरिएको छ। करिब १६ वर्ष सेवा दिएपछि उक्त विमान अब नियमित व्यावसायिक उडानबाट बाहिरिएको हो।
यो विमानले आफ्नो अन्तिम उडान ९ मार्च २०२६ मा भैरहवाबाट काठमाडौं सम्म गरेको थियो। सेवा अवधिभर यसले लाखौँ यात्रुलाई सुरक्षित रूपमा गन्तव्यसम्म पुर्‍याउँदै नेपालका आन्तरिक उडानमा महत्वपूर्ण भूमिका खेलेको थियो।

विमानले लामो समयसम्म सञ्चालन भएर आफ्नो आर्थिक तथा प्राविधिक जीवनचक्र पूरा गरेपछि कम्पनीले यसलाई सेवा मुक्त गरेको हो। बुद्ध एयरका अनुसार यस विमानले हजारौँ उडान चक्र पूरा गर्दै नेपालका विभिन्न आन्तरिक गन्तव्यमा नियमित उडान गरेको थियो।
कम्पनीका अध्यक्ष वीरेन्द्रबहादुर बस्नेतले यो विमानले नेपालमा हवाई सेवा विस्तार गर्न, यात्रुलाई सहज यात्रा उपलब्ध गराउन र कम्पनीको सेवा विस्तारमा महत्वपूर्ण योगदान दिएको बताए।
नेपालको आन्तरिक उड्डयन बजारमा प्रमुख स्थान ओगटेको बुद्ध एयरले सन् २०१० तिर पहिलो पटक ATR-72 विमान आफ्नो बेडामा थपेको थियो र त्यसपछि यी विमानहरू नेपालका पहाडी तथा दुर्गम गन्तव्यमा उडानका लागि व्यापक रूपमा प्रयोग हुँदै आएका छन्।
यो विमानको बिदाइसँगै बुद्ध एयरले आफ्ना बाँकी ATR-72 तथा अन्य आधुनिक विमानमार्फत आन्तरिक उडान सेवा निरन्तर सञ्चालन गर्ने जनाएको छ। ✈️