काठमाडौं – राष्ट्रिय स्वतन्त्र पार्टी (रास्वपा) को केन्द्रीय समिति बैठक सोमबार बस्दैछ। पार्टी सभापति रवि लामिछाने नेतृत्वमा फर्किन लागेका छन्। उनी गत कात्तिक २ गते सहकारी ठगी, संगठित अपराध र सम्पत्ति शुद्धीकरणका आरोपमा पक्राउ परेका थिए। त्यसयता डोलप्रसाद अर्याल (डिपी) कार्यवाहक सभापतिको भूमिकामा थिए। लामिछानेले पुनः जिम्मेवारी सम्हाल्ने तयारी गरेसँगै अर्यालले बैठकमा उनलाई धन्यवाद दिने र अध्यक्षता हस्तान्तरण गर्ने कार्यसूची तय भएको छ।
दोस्रो बैठक सभापति लामिछानेको अध्यक्षतामा सञ्चालन हुनेछ, जसमा पार्टी र संसदीय गतिविधिबारे छलफल गरिनेछ। सदस्यहरूलाई संक्षिप्त रिपोर्टिङको अवसर दिइनेछ। साथै, लिडरसिप एकेडेमीको संरचना (फ्लो चार्ट) र ‘जनयात्रा’ कार्यक्रमबारे समेत गहन छलफल हुने कार्यवाहक प्रवक्ता मनिष झाले जानकारी दिए।
यसबाहेक, चौथो कार्यसूचीमा पार्टीको राजनीतिक प्रतिवेदनलाई आधार बनाएर देशव्यापी जागरण अभियान र बहसको योजना बनाउने विषयमा छलफल गरिनेछ। पार्टीको भावी रणनीति र कार्यक्रमबारे समेत निर्णय हुने अपेक्षा गरिएको छ।
