काठमाडौं , माघ ९ गते । पछिल्लो समय विद्युतीय गाडीको आयात उल्लेख्य रुपमा बढेको छ । चालु आर्थिक वर्षको छ महिनामा मात्रै ५४ सय बढी इभि गाडी आयात भएका छन् ।
भन्सार विभाग तथ्यांकअनुसार पुस मसान्तसम्म पाँच हजार ४४० युनिट विद्युतीय कार, जीप र भ्यान आयात भएको हो । यस अवधिमा सरकारले १३ अर्ब १० करोड ८० लाख ७० हजार रुपैयाँ बराबरको उक्त संख्यामा गाडी आयात गरेको हो ।
उक्त संख्या गत वर्षको सोही अवधिको तुलनामा ७.३० प्रतिशतले बढी हो । गत वर्षको सोही अवधिमा नेपालले १२ अर्ब ७३ करोड २७ लाख रुपैयाँ बराबरको ५ हजार १०७ युनिट विद्युतीय गाडी आयात गरेको थियो ।
विद्युतीय गाडीको आयातसँगै राजस्व संकलनमा पनि सुधार देखिएको छ । गत वर्षको सोही अवधिमा इभि गाडीको आयातबाट ५ अर्ब ६७ करोड ३५ लाख रुपैयाँ राजस्व संकलन भएको थियो भने यस वर्ष आयातित गाडीबाट ८ अर्ब १६ करोड २३ लाख रुपैयाँ राजस्व संकलन भएको छ । जुन ४३.८६ प्रतिशतले बढी हो ।
नेपालमा विश्वप्रसिद्ध ब्रान्डका ५० किलोवाटदेखि ३०० किलोवाटका विद्युतीय गाडी आयात हुने गरेका छन् । यस अवधिमा सबैभन्दा धेरै ५१ देखि १०० किलोवाटका गाडी आयात भएका छन् । यस सेग्मेन्टमा ७ अर्ब ९६ करोड ५ लाख मूल्यका तीन हजार १९१ गाडी भित्रिएका छन् ।
सबैभन्दा धेरै विद्युतीय गाडी छिमेकी मुलुक चिनबाट आउने गरेको छ भने भारत, कोरिया, जर्मन, इन्डोनेसिया, अमेरिका लगायतका मुलुकहरूबाट पनि नेपालमा विद्युतीय सवारी आयात हुने गरेको छ ।
पुस मसान्तसम्म नेपालले ५० किलोवाटसम्मका तीन अर्ब १२ करोड ४३ लाख मूल्य बराबरका एक हजार ७२५ युनिट गाडी आयात गरेको छ । त्यस्तै १०१ देखि २०० किलोवाटका ५५३ युनिट, २०१ देखि ३०० किलोवाटसम्मका नौं ओटा गाडी भित्रिएका छन् भने ३०० किलोवाटमाथिका बिजुली गाडी २ युनिट आयात भएका छन् ।
