काठमाडौँ माघ १६ गते । सरकारले संघीय संसद्मा दर्ता गराएको सामाजिक सञ्जाल सञ्चालन, प्रयोग तथा नियमनसम्बन्धी विधेयकका केही प्रावधानप्रति नेपाल पत्रकार महासंघको गम्भीर ध्यानाकर्षण भएको छ ।
नेपाल पत्रकार महासंघको महासचिव राम प्रसाद दाहालले जारी गरेको प्रेस विज्ञप्तिमा अगुवा नागरिक संस्था महासंघलगायतका सरोकारवाला पक्षसँग सामान्य परामर्श र छलफलसमेत नगरी सरकारले प्रेस तथा अभिव्यक्ति स्वतन्त्रतामा आघात पार्ने केही प्रावधान समावेश गरी विधेयक अगाडि बढाएकोमा महासंघ गम्भीर असहमति र आपत्ति प्रकट गर्दछ भन्ने उल्लेख गरिएको छ।
महासंघलगायत सरोकारवाला पक्षसँग गहिरो संवादमार्फत विश्वव्यापी मानवअधिकार, प्रेस तथा अभिव्यक्ति स्वतन्त्रताको मूल्य मान्यता, हाम्रो संवैधानिक प्रावधान र प्रचलित अभ्याससँग तालमेल मिल्ने गरी प्रेस तथा अभिव्यक्ति स्वतन्त्रता कुण्ठित पार्ने प्रावधानहरू सच्याएरमात्र विधेयक अगाडि बढाउन महासंघ नेपाल सरकार र संघीय संसद्सँग आग्रह गर्दछ भन्ने कुरा प्रेस विज्ञप्तिमा उल्लेख गरिएको छ।
प्रेस तथा अभिव्यक्ति स्वतन्त्रतालाई संकुचन र नियन्त्रण गर्ने कुनै पनि कानुन स्वीकार्य नहुनेतर्फ पनि महासंघ सम्बद्ध पक्षको ध्यानाकर्षण गराएको छ ।
त्यसैगरी प्रकाशित समाचारको विषयलाई लिएर नेपाल पत्रकार महासंघ सप्तरी शाखाका सदस्य दिनेश पराजुली विरुद्ध प्रहरी कार्यालयमा अभद्र व्यवहारको उजुरी दिएकोप्रति महासंघको ध्यानाकर्षण भएको छ ।
आफ्नो विषयमा समाचार लेखेको आधारमा जनमत पार्टीका एक नेताले ्पत्रकार पराजुली विरुद्ध सप्तरीस्थित कंचनपुर इलाका प्रहरी कार्यालयमा अभद्र व्यवहारको उजुरी दिएकोे महासंघ सप्तरी शाखाले जनाएको छ ।
समाचारप्रति चित्त नबुझे प्रेस काउन्सिल नेपालमा उजुरी गर्न सकिने प्रवाधान रहेकामा त्यसलाई छलेर प्रहरी समक्ष उजुरी दिनु प्रचलित अभ्यास र प्रेस स्वतन्त्रता विरुद्ध हुन जाने महासंघको ठहर छ ।
प्रेसको संवैधानिक अधिकारको ख्याल गरी यस्ता कार्य नदोर्याउन सम्बन्धित पक्षको ध्यानाकर्षण गराउँदै महासंघ पत्रकारलाई निर्वाध र निर्भीकतापूर्वक काम गर्ने वातावरण बनाउन स्थानीय प्रशासनको ध्यानाकर्षण गराएको पनि गरेको छ ।
