बोली समाचारदाता
राजविराज, सप्तरी – मधेश प्रदेश कृषि विश्वविद्यालय आर्थिक संकटको चपेटामा परेको छ। सात महिनासम्म तलब नपाएपछि विश्वविद्यालयका उपप्राध्यापक तथा कर्मचारीहरू बाध्य भएर तालाबन्दीमा उत्रिएका छन्। बिहीवार उनीहरूले उपकुलपति डा. वैद्यनाथ महतोलाई कार्यकक्षबाट बाहिर निकाली प्रशासनिक भवन तथा कक्षा कोठाहरूमा तालाबन्दी गरेका छन्।
तालाबन्दीपछि विश्वविद्यालयका सबै शैक्षिक तथा प्रशासनिक गतिविधिहरू ठप्प भएका छन्। कृषि, पशुपालन, माछापालन तथा खाद्य प्रविधि संकायमा अध्ययनरत करिब १०० विद्यार्थीको कक्षा प्रभावित भएको छ।
सरकारसँग पटक–पटक आग्रह, तर सुनुवाइ शून्य
विश्वविद्यालयका उपप्राध्यापक रामनन्दन यादवका अनुसार आवश्यक बजेटको अभावमा लामो समयदेखि तलब रोकिएको छ। विश्वविद्यालय सञ्चालनका लागि आवश्यक कोष नहुँदा कर्मचारीहरूले आफ्नै खर्चमा काम गरिरहेका थिए। तर, प्रदेश सरकारबाट कुनै ठोस पहल नभएपछि अन्ततः तालाबन्दी गर्नुको विकल्प नभएको उनले बताए।
यादवले भने, “हामीले प्रमुख जिल्ला अधिकारीमार्फत प्रदेश सरकारलाई पत्राचार गरिसकेका थियौं। माघ ३० भित्र हाम्रो माग पूरा नगरे तालाबन्दी गर्छौं भनेर जानकारी गराएका थियौं। तर, सरकार मौन बस्यो।”
स्वीपरदेखि प्राध्यापकसम्म आर्थिक सङ्कटमा
तलब नपाएर समस्या झेल्नेमा विश्वविद्यालयका स्वीपरदेखि उपप्राध्यापकसम्म सबै छन्। स्वीपर सोमन देवी मेहतरले सात महिनासम्म तलब नपाउँदा हातमुख जोड्न मुस्किल भएको बताइन्। अर्का उपप्राध्यापक डा. नितेश कुमार यादवका अनुसार ८ जना उपप्राध्यापक र १८ जना कर्मचारीले गत साउनदेखि तलब पाएका छैनन्।
राजनीतिक हस्तक्षेपले संकट झन् जटिल
प्रदेश सरकारले दक्ष कृषिजनशक्ति उत्पादन गर्ने उद्देश्यले २०७८ साल मंसिर २७ गते मधेश प्रदेश कृषि विश्वविद्यालय स्थापना गरेको थियो। तर, पछिल्लो समय जनता समाजवादी पार्टी नेपाल र जनमत पार्टीबीचको राजनीतिक द्वन्द्वका कारण विश्वविद्यालय अझै अस्थिर बन्दै गएको छ।
उपकुलपति डा. महतोले विश्वविद्यालयका समस्या समाधान गर्न पटक–पटक सम्बन्धित निकायसँग आग्रह गरिसकेको दाबी गरे। तर, प्रदेश सरकारबाट कुनै पहल नभएपछि अवस्था बिग्रँदै गएको उनको भनाइ छ।
अब प्रदेश सरकारले यस समस्यालाई गम्भीर रूपमा लिएर समाधान नगरे विश्वविद्यालयका विद्यार्थी, प्राध्यापक तथा कर्मचारीहरू अझै ठूलो संकटमा पर्ने देखिन्छ।
