सर्लाही, मधेश प्रदेश चैत २२ गते— मधेश सरकारका गृह, संचार तथा कानुन मन्त्री राजकुमार लेखीले नागरिकको शासनप्रति भरोसा घट्नुमा नेतृत्व तहको बोली र व्यवहारबीचको असमानतालाई मुख्य कारणका रूपमा औंल्याएका छन्। सर्लाहीको लालबन्दीमा आयोजना गरिएको “स्थानीय तहको कानुन तर्जुमा सम्बन्धी दुई दिने अन्तरक्रिया कार्यक्रम”लाई सम्वोधन गर्दै मन्त्री लेखीले नेतृत्व तहबाट आउने वाचा र व्यवहारबीचको अन्तरले जनतामा असन्तुष्टि र वितृष्णा बढेको धारणा व्यक्त गरे।
उनका अनुसार, राजनीतिक मञ्चमा नेतृत्वले धेरै आश्वासन दिने तर कार्यान्वयनमा चुकेको प्रवृत्तिले सरकारप्रति जनताको विश्वास डगमगाउन थालेको छ। मन्त्री लेखीले सरकारी सेवामा देखिने ढिलासुस्ती, सेवाग्राहीलाई घण्टौंसम्म लाइनमा उभिनुपर्ने बाध्यता र समाधान नपाउनु जस्ता समस्याहरूले प्रशासनिक संयन्त्रप्रति जनताको नकारात्मक धारणा बनाएको बताए।
“जिल्ला प्रशासन, प्रहरी, मालपोत कार्यालयजस्ता सेवाप्रदायक निकायहरूमा आमनागरिकले चार–पाँच घण्टा लाइनमा बसेर पनि काम नपाउने अवस्था छ। यसले नागरिकमा वर्तमान प्रणालीप्रति वितृष्णा मात्र होइन, विकर्षणसमेत पैदा गरेको छ,” मन्त्री लेखीले स्पष्ट पारे।
कार्यक्रमको अवसरमा मन्त्री लेखीले ऐन, नियम तथा कानुन नागरिकमैत्री र व्यवहारिक हुनुपर्नेमा जोड दिए। उनका अनुसार, यदि कानुनले नागरिकको जीवन सहज बनाउने वातावरण सिर्जना गर्न सकेन भने त्यसको औचित्यमाथि नै प्रश्न उठ्नेछ।
पत्रकारिता र लोकतान्त्रिक आन्दोलनमा योगदानको कदर
अर्को सन्दर्भमा मन्त्री लेखीले लोकतन्त्र, गणतन्त्र, संघीयता र समावेशिताजस्ता परिवर्तनशील राजनीतिक संरचनाको विकासमा पत्रकारको योगदान अपरिहार्य रहेको बताए। पत्रकारहरूले जनचेतना जगाउने, सत्ताको निगरानी गर्ने र नागरिकको आवाज बुलन्द पार्ने काम गरेर समाजमा दीर्घकालीन परिवर्तन ल्याएको मन्त्री लेखीको भनाइ थियो।
कार्यक्रममा सहभागीता
लालबन्दीमा आयोजित दुई दिने अन्तरक्रिया कार्यक्रममा सर्लाही जिल्लाका सबै २० वटै स्थानीय तहबाट जनप्रतिनिधिहरू र कर्मचारीहरूको उल्लेखनीय सहभागिता रह्यो। कानुन निर्माणमा स्थानिय तहको भूमिका, व्यावहारिक कठिनाइ, र सुधारका सम्भावनाहरूमाथि गम्भीर छलफल भएको कार्यक्रममा सहभागिहरूले जनाएका छन्।
मन्त्री लेखीका अभिव्यक्तिहरू केवल टिप्पणी मात्र नभई नीति निर्माण र कार्यान्वयनको तहमा सुधारको माग पनि हुन्। मधेश प्रदेश सरकारको नेतृत्वद्वारा जनभावना अनुसार ऐन कानुन बनाउने प्रतिबद्धता देखिँदै गर्दा, व्यवहारमा समेत त्यही प्रतिबिम्ब देखिनु आवश्यक छ। नेतृत्वको बोली र व्यवहारबीचको सन्तुलनले मात्र नागरिकको भरोसा पुनःस्थापना गर्न सक्नेछ भन्ने सन्देश मन्त्री लेखीले दिएको देखिन्छ।
