मोरङ, चैत २१ गते — नेपाली कांग्रेसका वरिष्ठ नेता डा. शेखर कोइरालाले हाल देशमा विद्यमान राजनीतिक तथा सामाजिक समस्याहरूको समाधान संविधानको चौघेराभित्र रहेर खोजिनुपर्ने बताएका छन्।
मोरङ जिल्लाको बुढीगंगा गाउँपालिका-१ मा निर्माण हुन लागेको बुढीगंगा पार्कको शिलान्यास कार्यक्रममा प्रमुख अतिथिका रूपमा बोल्दै उनले संविधानसम्मत तरिकाले शान्तिपूर्ण आन्दोलन गर्नु सबै नागरिकको मौलिक अधिकार भएको स्पष्ट पारे।
उनले नेपाली कांग्रेस कुनै पनि किसिमको हिंसा, आतंक, तोडफोड र आगजनीलाई समर्थन नगर्ने उल्लेख गरे। साथै, उनले हालै काठमाडौँमा भएको घटनाको निष्पक्ष छानबिन गर्न सरकारलाई आग्रह गरे। “नेपाली जनताले राज्य प्रणालीप्रति विश्वास राख्न सकून्, त्यसका लागि सरकार गम्भीर भएर छानबिन समिति गठन गरी यथाशक्य चाँडो सत्य बाहिर ल्याउनुपर्छ,” उनले भने।
राजनीतिक स्थायित्व र आर्थिक विकासको आवश्यकता
नेता कोइरालाले राजनीतिक स्थायित्व कायम राख्न र लोकतान्त्रिक मूल्य-मान्यतामा आधारित शासन प्रणालीलाई बलियो बनाउन दलहरूले आफ्नो आचरण सुधार्नुपर्ने आवश्यकता औंल्याए। “हामी जनताको मन जित्न सक्नुपर्छ। त्यसका लागि स्वच्छ राजनीति, पारदर्शिता र प्रतिबद्धता जरुरी छ,” उनले थपे।
उनले नेपाली कांग्रेस र नेकपा (एमाले) मिलेर सरकार निर्माण गरे पनि संविधान संशोधन, सुशासन, आर्थिक समृद्धि र रोजगारी सिर्जना गर्ने प्रतिवद्धता पूरा हुन नसकेको स्वीकार गरे। “हामीले जनतासँग गरेका वाचाहरू पूरा गर्ने दिशामा गम्भीर बन्नै पर्छ,” कोइरालाले भने।
स्वरोजगार सिर्जना र प्राकृतिक स्रोतहरूको सदुपयोगमा जोड
नेता कोइरालाले नेपालमा रहेका प्राकृतिक स्रोतहरूको अधिकतम उपयोग गरी युवाहरूलाई स्वरोजगार बनाउने योजना आवश्यक रहेको औंल्याए। उनले नेपाल कृषि, जलविद्युत्, जडीबुटी तथा पर्यटनको प्रचुर सम्भावना बोकेको मुलुक भएकाले यी क्षेत्रको उचित व्यवस्थापन गरेमा नेपाली जनतालाई समृद्ध बनाउन सकिने विश्वास व्यक्त गरे। “युवाहरूलाई रोजगारका लागि विदेश जानुपर्ने अवस्थाको अन्त्य गर्नु हाम्रो प्राथमिकता हुनुपर्छ,” उनले जोड दिए।
उनले आगामी दिनमा विकास निर्माण तथा रोजगारी सिर्जनाका लागि ठोस नीति ल्याएर कार्यान्वयन गर्नुपर्ने सुझाव दिए। नेपाली कांग्रेस जनताको पक्षमा रहेर काम गर्न प्रतिबद्ध रहेको उल्लेख गर्दै उनले पार्टीभित्र पनि सुधार आवश्यक रहेको औंल्याए।
समाजमा शान्ति र सुव्यवस्था कायम राख्नुपर्ने आवश्यकता
नेता कोइरालाले कुनै पनि किसिमको हिंसात्मक गतिविधि मुलुकको हितमा नरहेको भन्दै नागरिकलाई संयमित रहन आग्रह गरे। “हामीले कानुनी राज्यलाई सशक्त बनाउनुपर्छ। राज्य संयन्त्रलाई जनताप्रति उत्तरदायी बनाउनु हाम्रो कर्तव्य हो,” उनले भने। उनले सरकारले सबै पक्षसँग संवाद गरी मुलुकलाई स्थायित्व र समृद्धितर्फ लैजान आवश्यक रहेको उल्लेख गरे।
बुढीगंगा पार्कको शिलान्यास कार्यक्रममा विभिन्न दलका स्थानीय नेताहरू, जनप्रतिनिधिहरू, समाजसेवीहरू तथा स्थानीय बासिन्दाहरूको उल्लेखनीय उपस्थिति रहेको थियो।
