बोली समाचारदाता
जनकपुरधाम, फागुन २०
नेपालले जारी गरेको चुच्चे नक्सा कार्यान्वयनबारे नेकपा समाजवादीका वरिष्ठ नेता तथा पूर्वप्रधानमन्त्री झलनाथ खनाल ले गम्भीर टिप्पणी गरेका छन्। उनले हालको सरकार नक्साको विषयमा कडा कदम चाल्न असफल भएको बताउँदै, यसको अवस्था नागपञ्चमीको दिन भित्तामा टाँसिने नागझैं प्रतीकात्मक मात्र भएको आरोप लगाए।
सरकारको कमजोरीले प्रतिक्रियावादी शक्तिहरू अघि बढ्दै
एक पत्रकार सम्मेलनमा बोल्दै खनालले चुच्चे नक्सा व्यवहारिक रूपमा कार्यान्वयन गर्न स्टेप बाइ स्टेप प्रक्रिया आवश्यक रहेको बताए। उनले हाल सरकारको भूमिका कमजोर भएको उल्लेख गर्दै, बढ्दो गैर-जिम्मेवारीपन र असफलताको कारणले प्रतिक्रियावादी शक्तिहरू फेरि बलियो बन्दै गएको चेतावनी दिए।
खनालका अनुसार, संविधान जारी भएपछिका सरकारहरूले प्रभावकारी काम गर्न नसकेकाले देशमा राजनीतिक अस्थिरता बढ्दै गएको छ। उनले पूर्वराजाको पछिल्ला अभिव्यक्तिहरू प्रति संकेत गर्दै, प्रतिक्रान्तिको सम्भावना बलियो बन्दै गएको बताएका छन्।
बेरोजगारी र विदेश पलायनबारे गम्भीर चिन्ता
खनालले देशमा बेरोजगारी चरम सीमामा पुगेको र विभिन्न क्षेत्रको असफलताका कारण युवाहरूको विदेश पलायन दर ह्वात्तै बढेको बताए। उनले नेपालका नेताहरू नै देशको मानव संसाधनलाई विदेशी भूमिमा पठाउने दलाल संस्थाका रूपमा परिणत भएको आरोप समेत लगाए।
उनका अनुसार, अर्थतन्त्र, शिक्षा, स्वास्थ्य, कृषि जस्ता सबै क्षेत्र संकटमा छन्, जसका कारण नेपाल आन्तरिक रूपमा कमजोर हुँदै गएको छ।
सिद्धान्तमा आधारित गठबन्धन हुनसक्ने संकेत
पत्रकार सम्मेलनमा पत्रकारहरूका प्रश्नहरूको उत्तर दिँदै खनालले आफ्नो पार्टी हाल कुनै पार्टीसँग एकीकरण गर्ने योजनामा नरहेको स्पष्ट पारे। तर उनले सिद्धान्त र मुद्दाका आधारमा गठबन्धन (एलायन्स) हुनसक्ने सम्भावना खुला रहेको बताए।
खनालका यी अभिव्यक्तिहरूले चुच्चे नक्सा कार्यान्वयन, नेपाल-भारत सीमा विवाद, बेरोजगारी तथा राजनीतिक अस्थिरताको विषयलाई पुनः चर्चाको केन्द्रमा ल्याएको छ।
