काठमाडौं, माघ २३ गते । पालिकासमय डटकमका सम्पादक कमल बहादुर बोहरामाथि अज्ञात व्यक्तिबाट भएको आक्रमणप्रति नेपाल पत्रकार महासंघले गम्भीर ध्यानाकर्षण जनाएको छ ।
यही माघ २१ गते सोमबार काठमाडौंको मध्यबानेश्वरमा नेपाल पत्रकार महासंघ काठमाडौं शाखाका सदस्यसमेत रहेका बोहरामाथि अज्ञात व्यक्तिले आक्रमण गरेका थिए ।
महासंघ काठमाडौं शाखाले एक विज्ञप्ति जारी गर्दै कुनै पनि बहानामा पत्रकारमाथि हुने यस्ता हर्कत प्रेस स्वतन्त्रताविरोधी भएको जनाएको छ । महासंघले घटनामा संलग्नको तत्काल पहिचान गरी कानुनी दायरामा ल्याउन र पत्रकारको सुरक्षामा गम्भीर हुन सम्बन्धित निकायको ध्यानाकर्षण गराएको छ ।
“प्रेस स्वतन्त्रताविरोधी यो घटनाको महासंघ कडा शब्दमा भत्र्सना गर्दछ,” महासंघका महासचिव रामप्रसाद दाहालद्वारा जारी विज्ञप्तिमा भनिएको छ, “महासंघ घटनामा संलग्नको तत्काल पहिचान गरी कानुनी दायरामा ल्याउन र पत्रकारको सुरक्षामा गम्भीर हुन सम्बन्धित निकायको ध्यानाकर्षण गराउँदछ ।”
