सबैलामा सशक्त बालिका परियोजनाको सामाजिक लेखा परीक्षण सम्पन्न

जनकपुरधाम, जेठ २० गते ।
सबैला नगरपालिकामा सञ्चालित ‘सशक्त वालिका परियोजना’ अन्तर्गत नगरस्तरीय सामाजिक लेखा परीक्षण कार्यक्रम सम्पन्न भएको छ। प्लान इन्टरनेशनल नेपालसँगको साझेदारीमा जानकी महिला जागरण समाजद्वारा सञ्चालित यस परियोजनाले प्रारम्भिक बाल विकास र संरक्षणमा केन्द्रित रही सबैला सहित पाँच पालिकामा क्रियाशील छ।

कार्यक्रमको उद्देश्य र सहभागिता

जानकी महिला जागरण समाजकी अध्यक्ष मन्दा कुमारी कर्णको अध्यक्षतामा सम्पन्न कार्यक्रममा नगर उपप्रमुख रहिमा खातुन, नगरस्तरीय प्रारम्भिक बाल विकास समितिका पदाधिकारीहरू, प्लान इन्टरनेशनल नेपालका कार्यक्रम विज्ञहरू, अनुगमन शाखाका अधिकृतहरू, नगरपालिका अन्तर्गतका शिक्षा, स्वास्थ्य, सामाजिक विकास तथा महिला बालबालिका शाखाका प्रमुखहरू, सम्बन्धित वडाका अध्यक्षहरू, स्वास्थ्य संस्थाका प्रमुख तथा प्रतिनिधिहरू, अभिभावक शिक्षा समूहका अभिभावकहरू, समुदायका किशोरीहरू, र परियोजनामा संलग्न पदाधिकारी, कर्मचारी तथा सामुदायिक सहजकर्ताहरूको उपस्थिति रहेको थियो।

परियोजनाका प्रमुख उपलब्धिहरू

परियोजना संयोजक निकिता सिंह यादवद्वारा प्रस्तुत गरिएको प्रतिवेदन अनुसार, विगत सेप्टेम्बर महिनादेखि हालसम्मका गतिविधिहरूमा निम्न उपलब्धिहरू उल्लेखनीय छन्:

५२ वटा अभिभावक शिक्षा समूहमा ८/८ वटा कक्षाहरू सञ्चालन ।

८ वटा किशोरी समूहमा २३ वटा ‘स्टिक एन्ड स्टोन’ सत्रहरू सम्पन्न।

सकारात्मक अभिभावकत्व कक्षा र अन्तरपुस्ता संवाद कार्यक्रमहरू सञ्चालन।

नवजात शिशु स्वागत, हिंसा पीडित र अति गरिब परिवारलाई जीवन निर्वाहका लागि आवश्यक सामग्री वितरण।

छलफल र सुझावहरू

कार्यक्रममा सहभागीहरूले परियोजनाको प्रभावकारिता र समुदायमा देखिएको सकारात्मक परिवर्तनको प्रशंसा गर्दै आगामी दिनमा यसको निरन्तरता र विस्तारको लागि अनुरोध गरेका थिए। उठेका प्रश्नहरूको उत्तर प्लान इन्टरनेशनल नेपालका मिहिर कुमार झा, जानकी महिला जागरण समाजकी निकिता सिंह यादव, र सम्बन्धित वडाका अध्यक्षहरूले प्रदान गरेका थिए। छलफल कार्यक्रमको सहजीकरण पत्रकार धर्मेन्द्र कुमार झाले गरेका थिए।

आगामी योजना

कार्यक्रमको समापनमा उपप्रमुख रहिमा खातुनले परियोजनाबाट समुदायमा देखिएको सकारात्मक प्रभावप्रति खुसी व्यक्त गर्दै परियोजना टिमलाई धन्यवाद दिइन्। अध्यक्ष मन्दा कुमारी कर्णले सरोकारवालाहरूको सुझावलाई मध्यनजर गर्दै पालिकाहरूसँग सहकार्य गरी आगामी दिनमा बाल विवाह न्यूनीकरण र बालिका संरक्षणका क्षेत्रमा प्रभावकारी क्रियाकलापहरू सञ्चालन गर्ने प्रतिबद्धता व्यक्त गरिन्।

यो सामाजिक लेखा परीक्षण कार्यक्रमले परियोजनाको पारदर्शिता, उत्तरदायित्व, र समुदायमा देखिएको सकारात्मक प्रभावलाई उजागर गर्दै आगामी दिनमा अझ प्रभावकारी कार्यान्वयनको मार्ग प्रशस्त गरेको छ।