ललित झा
जयनगर, बिहार – फागुन १८ गते
भारत-नेपाल सीमा क्षेत्रमा तस्करी नियन्त्रणलाई मजबुत बनाउन सशस्त्र सीमा बल (SSB) ४८औं वाहिनीले ठूलो सफलता हात पारेको छ। गुप्त सूचनाको आधारमा चलाइएको विशेष गस्ती अभियानमा नक्कली भारतीय तथा नेपाली मुद्रा सहित विभिन्न आपत्तिजनक सामग्री बरामद गरिएको छ भने एक जना तस्कर पक्राउ परेका छन्।
यो कारबाही मधुबनी जिल्लाको बसोपट्टी थाना क्षेत्र अन्तर्गत भारत-नेपाल सीमा नजिक बीओपी जांकिनगरको सरिता गाछी क्षेत्रमा भएको हो। नेपालबाट भारततर्फ तस्करी भइरहेको गुप्त सूचना पाएपछि एसएसबी टोलीले सीमाभन्दा २० मिटर भारत भित्र निगरानी गर्दै कारबाही सञ्चालन गरेको थियो।
एसएसबीले पक्राउ परेका मोहम्मद ताहिर (५६ वर्ष), जयनगर, मधुबनीका बासिन्दा रहेको खुलाएको छ। उनीसँगै नक्कली भारतीय रुपैयाँ १३,८०० (₹१०० दरका १३८ नोट) र नक्कली नेपाली रुपैयाँ ६,५०० (रु. ५०० दरका १३ नोट) बरामद गरिएको छ। साथै, बजाज प्लेटिना मोटरसाइकल (BR-32 S 3105), रेडमी 10T 5G मोबाइल फोन (Jio र Airtel सिम सहित), चाँदी जस्तो देखिने दुई वटा औंठी, क्यासियो ब्रान्डको घडी र भारतीय रुपैयाँ ७७० समेत जफत गरिएको छ।
पक्राउ परेका तस्करलाई थप अनुसन्धानका लागि बसोपट्टी प्रहरी चौकीमा बुझाइएको छ।
एसएसबीका कार्यवाहक कमान्डेन्ट श्री विवेक ओझाले यो अपरेशनलाई सुरक्षाको महत्वपूर्ण सफलता भन्दै भने, “नक्कली मुद्रा तस्करीले देशको अर्थतन्त्र र सुरक्षामा गम्भीर असर पार्छ। यस कारबाहीले हाम्रो सीमाको सुरक्षा अझ मजबुत बनाउनेछ। म यस सफल अपरेशनका लागि सम्पूर्ण एसएसबी जवानहरूलाई बधाई दिन चाहन्छु।”
पछिल्लो समय भारत-नेपाल सीमामा नक्कली मुद्रा तथा अन्य अवैध कारोबारका गतिविधि बढ्दै गएकाले दुवै देशका सुरक्षा निकायहरूले थप सतर्कता अपनाउनु पर्ने आवश्यक देखिएको छ।
