वर्षाले डुबाएकोको गाउँ, पाँच महिनापछि पलायो- आशाको किरण

बोली समाचारदाता ।

सर्लाही, ब्रह्मपुरी फागुन २० गते – पाँच महिना अगाडिको रात, असोज महिनाको बाढीले ब्रह्मपुरी गाउँका धेरै परिवारको जिन्दगी उजाड बनाइदियो। कसैको घर बगे, कसैको उठीबास लाग्यो। रातभरि झरी परिरहेको थियो, पानीको भेल घरभित्रै पसिसकेको थियो। पाँच महिना बित्यो, गाउँको घाउ पुरिन सकेको थिएन। तर, आशाको किरण फेरि ब्रह्मपुरीमा झुल्किएको छ।
प्लान इन्टरनेसनल नेपालले नेपाल फ्लड रिस्पन्स परियोजना अन्तरगत बाढी पीडितहरूलाई राहत वितरण गर्यो। जानकी महिला जागरण समाजको समन्वयमा भएको यो कार्यक्रममा स्वच्छता सामग्री, न्यानो कपडा, र भान्साका सामग्री वितरण गरियो।

स्थानीय सरकार र संस्थाहरूको सहभागिता

राहत वितरण कार्यक्रम ब्रह्मपुरी गाउँपालिकाका मेयर राम पदारथ शाहको हातबाट सुरू भयो। त्यस्तै, जानकी महिला जागरण समाजका कार्यकारी निर्देशक राजन नेपालले पनि राहत वितरण गरे। सो कार्यक्रममा प्लान इन्टरनेसनल नेपालका मिहिर झा सहितका प्रतिनिधिहरूको सहभागिता रहेको थियो। त्यस्तै कार्यक्रममा जानकी महिला जागरण समाजका प्रोजेक्ट म्यानेजर विष्णु भण्डारी, नित्यानन्द मण्डल, रामदत ठाकुर, विगेन्द्र शाह लगायतका व्यक्तिहरू महत्वपूर्ण सहभागिता रहेको थियो।

कार्यक्रममा सम्बोधन गर्दै राजन नेपालले भने, “हामी केवल राहत लिएर आएका होइनौं, पुनःस्थापनाको योजना पनि लिएर आएका छौं।”

प्रोजेक्ट म्यानेजर विष्णु भण्डारी ले नेपालका विभिन्न बाढी प्रभावित क्षेत्रहरूमा निरन्तर राहत वितरण भइरहेको जानकारी गराए।

के–के सामग्री वितरण गरियो?

प्रति परिवार वितरण गरिएका सामग्रीहरू यसप्रकार छन्:

स्वच्छता सामग्री – साबुन, टूथब्रस, सेनिटरी प्याड आदिको मूल्य रु. ३,३९४.५६

भान्साका सामग्री – भाँडा, कराही, चुलो आदिको मूल्य रु. ३,२७६.२२

न्यानो कपडा – ब्ल्यांकेट, ज्याकेट, स्वेटर, टोपी, मोजा आदिको मूल्य रु. २१,७२६.४६

“राहत मात्रै होइन, पुनःस्थापनाको आवश्यकता छ”

स्थानीय मेयरले राहत वितरणलाई “ढिलो भए पनि आवश्यक र सह्रानीय पहल” भने। उनले थपे, “सहयोगी हातहरू अगाडि आएनन् भने, वर्षाले बगाएको जिन्दगी उठाउन धेरै वर्ष लाग्छ।”

बाँच्ने ऊर्जा फेरि फर्किँदै

पाँच महिनासम्म बाढी पीडितहरूले सहयोगको प्रतीक्षा गरे। आज उनीहरूको अनुहारमा राहत मात्रै होइन, आशाको झलक पनि थियो। बाढीले उजाड बनाएको ब्रह्मपुरीमा अहिले फेरि बाँच्ने ऊर्जा फिर्दै छ। राहत वितरणको यो कार्यले पीडितहरूलाई बल दिएको छ, उनीहरूलाई बाँच्ने साहस दिएको छ।