बोली समाचारदाता ।
जनकपुरधाम, फागुन १९ गते– जनकपुरधाममा जारी बिवाईडी (BYD) चौथो अन्तर स्कुल टी–२० क्रिकेट प्रतियोगितामा आज दुई रोमाञ्चक खेल सम्पन्न भए। पहिलो खेलमा मदर टरेसा पब्लिक स्कुलले सिटी मोन्टेशरी स्कुललाई १९७ रनले पराजित गर्दै प्रभावशाली जित हासिल गर्यो भने दोस्रो खेलमा न्यु भिजन स्कुलले गोगल प्रसाद स्कुललाई ७ रनको झिनो अन्तरले हरायो।
मदर टरेसाको एकतर्फी जित, आदर्श यादवको शतक
पहिलो खेलमा मदर टरेसा पब्लिक स्कुलले टस जितेर ब्याटिङ गर्ने निर्णय गर्यो। आदर्श यादवको विस्फोटक प्रदर्शनको मद्दतले टिमले निर्धारित २० ओभरमा मात्र २ विकेट गुमाएर २१३ रनको विशाल स्कोर खडा गर्यो। यादवले ५९ बलमा १०५ रन बनाउँदै शानदार शतक प्रहार गरे, भने युवराज साहले २७ बलमा ४२ रनको योगदान दिए।
जवाफमा, सिटी मोन्टेशरी स्कुलको ब्याटिङ लयमा आउनै सकेन। मदर टरेसाका बलर रिशन झाको घातक बलिङका अगाडि सिटी मोन्टेशरीका ब्याटरहरू टिक्न सकेनन्। उनले ११ रन खर्चेर ६ विकेट लिएपछि विपक्षी टिम १६ रनमै समेटियो। सक्क्षम साहले मात्र ९ रन बनाउनु बाहेक अरू कुनै ब्याटरले दोहोरो अंक छुन सकेनन्। १९७ रनको फराकिलो अन्तरको जित निकाल्दै मदर टरेसा पब्लिक स्कुलले आफ्नो दबदबा देखायो। म्यान अफ द म्याच आदर्श यादव घोषित भए।
न्यु भिजन स्कुलको संघर्षपूर्ण जित
दोस्रो खेल न्यु भिजन स्कुल र गोगल प्रसाद स्कुलबीच प्रतिस्पर्धात्मक रह्यो। गोगल प्रसाद स्कुलले टस जितेर पहिले फिल्डिङ गर्ने निर्णय गर्यो। न्यु भिजनका ब्याटरहरू लामो पारी खेल्न असफल भए, जसका कारण टिम ८८ रनमै समेटियो। नविरुलले १४ रनको योगदान दिए भने गोगल प्रसादका बलर विवेक मिश्राले उत्कृष्ट प्रदर्शन गर्दै ३ विकेट लिए।
८९ रनको लक्ष्य पछ्याउन आएका गोगल प्रसाद स्कुलका ब्याटरहरू राम्रो सुरुवात गर्न सफल भए पनि न्यु भिजनका बलरहरूले खेलमा पुन: पकड जमाए। विवेक मिश्राको ४१ रनको इनिङ्स गोगल प्रसादका लागि हिम्मतिलो प्रयास रह्यो, तर उनको टिम ८१ रनमै समेटियो। न्यु भिजन स्कुलका लागि संजित महतोले ३ विकेट, सुजित महतोले २ विकेट लिए भने नविरुलले १ विकेट झारे। ७ रनको रोमाञ्चक जित हात पार्दै न्यु भिजन स्कुलले अर्को चरणमा आफ्नो स्थान सुरक्षित गर्यो। नविरुल म्यान अफ द म्याच घोषित भए ।
