लहान — मधेश प्रदेश सरकारका गृह, सञ्चार तथा कानुनमन्त्री राजकुमार लेखीले नेपालमा राजतन्त्र फर्किनु कुनै पनि हालतमा सम्भव नरहेको बताएका छन्। बिहीबार लहानमा मिडिया काउन्सिल मधेस प्रदेशद्वारा आयोजित ‘पत्रकारिताको आचारसंहिता’ सम्बन्धी गोष्ठीमा मन्त्री लेखीले यो धारणा राखेका हुन्।
उनका अनुसार, लोकतान्त्रिक व्यवस्थामार्फत जनताले गरेका निर्णय नै सर्वोपरी छन्, र हालको शासन प्रणाली नै उत्कृष्ट भएको पुष्टि हालसम्मको निर्वाचन परिणामले गरिसकेको छ। “अहिलेको व्यवस्था नै सर्वोत्कृष्ट हो,” उनले भने, “राजतन्त्रको एजेन्डा बोकेर केही दलहरू सक्रिय छन्, तर जनताले तिनलाई स्वीकार गरिरहेका छैनन्।”
मन्त्री लेखीले इतिहासको प्रसंग जोड्दै, “निरंकुश राजतन्त्रका बेला राजाका हरूले जथाभावी गर्न पाउँथे, तर अहिले त्यो सम्भव छैन,” भने। उनले हालको संघीय प्रणाली, समावेशीता, र समानुपातिक निर्वाचन प्रणाली जनताकै संघर्षबाट स्थापित भएको बताउँदै, यसको विपक्षमा कोही नरहेको जिकिर गरे।
तर, उनले लोकतान्त्रिक व्यवस्थामा देखिएको गडबडीप्रति सचेत हुन आवश्यक रहेको भन्दै दलहरू सुधारात्मक मार्गमा अघि बढ्नुपर्नेमा जोड दिए। “व्यवस्थालाई सबल बनाउन गडबडी र बेथितिको पर्दाफास गर्न पत्रकारिताले निर्भीक भएर काम गर्नुपर्छ,” मन्त्री लेखीले भने।
