काठमाडौं, १७ चैत – काठमाडौंको नागार्जुनमा शनिबार राति भएको गाडी दुर्घटनामा एक जनाको मृत्यु भएको छ भने दुई जना घाइते भएका छन्।
नागार्जुन नगरपालिका-८ ठुलो खोला नजिक धादिङबाट काठमाडौं आउँदै गरेको टाटा योद्धा (प्र ३ -०१-०२४ च ८३२२) दुर्घटनाग्रस्त भएको हो। दुर्घटनामा गोरखा भीमेश्वर गाउँपालिका-४ निवासी ५० वर्षीय गोकुल पाण्डे गम्भीर घाइते भए। उनलाई उपचारका लागि स्वयम्भूस्थित मनमोहन अस्पताल पुर्याइएको थियो, जहाँ उपचारकै क्रममा उनको निधन भएको प्रहरीले जनाएको छ।
दुर्घटनामा गाडी चालक ४१ वर्षीय जमालुदिन मिया र ४३ वर्षीय रामजी भट्ट घाइते भएका छन्। उनीहरूको हाल अस्पतालमा उपचार भइरहेको छ।
प्रहरीले दुर्घटनाको कारणबारे अनुसन्धान गरिरहेको जनाएको छ। प्रारम्भिक रिपोर्टअनुसार, गाडी तीव्र गतिमा रहेको हुन सक्ने अनुमान गरिएको छ।
