काठमाडौं– प्रधानमन्त्रीले आगामी प्रतिनिधि सभा निर्वाचन दुई चरणमा हुन सक्ने सम्भावनाबारे धारणा सार्वजनिक गरेकी छन्। उच्च पहाडी र हिमाली भेगमा मौसमको प्रतिकूल अवस्था देखिन सक्ने भएकाले सबै नागरिकलाई मतदानको अवसर सुनिश्चित गर्न वैकल्पिक उपायबारे सोच्नुपरेको उनको भनाइ छ।
प्रधानमन्त्रीले हिमाली र दुर्गम क्षेत्रमा फागुन महिनामा हिउँपात र मौसम खराब हुने सम्भावनाका कारण मतदान केन्द्रसम्म पुग्न मतदातालाई कठिनाइ हुन सक्ने बताइन्। यस्तो अवस्थामा राज्यको दायित्व नागरिकको मतदान अधिकार सुनिश्चित गर्नु भएकाले आवश्यक परे फरक–फरक चरणमा निर्वाचन गर्न सकिने विकल्प खुला राखिएको उनको भनाइ छ।
उनका अनुसार एउटा विकल्पका रूपमा दुर्गम क्षेत्रका मतदातालाई यातायातको व्यवस्था गरेर मतदान केन्द्रसम्म ल्याउने उपाय पनि विचारमा छ। तर मौसम अत्यन्तै प्रतिकूल भएमा निर्वाचनलाई चरणगत रूपमा सम्पन्न गराउने विषयमा छलफल हुन सक्ने उनले स्पष्ट पारिन्।
उच्च पहाडी तथा हिमाली जिल्लाका जनप्रतिनिधि र सरोकारवालाले पहिल्यैदेखि मौसम र भौगोलिक चुनौतीबारे सरकार र सम्बन्धित निकायको ध्यानाकर्षण गराउँदै आएका छन्। हिउँपातका कारण सडक, हवाई सेवा र पैदल मार्ग प्रभावित हुँदा मतदान प्रक्रिया जटिल बन्ने सम्भावना रहेको उनीहरूको भनाइ छ।
सरकारले अहिलेसम्म निर्वाचन मिति परिवर्तन वा दुई चरणमा निर्वाचन गर्नेबारे औपचारिक निर्णय नगरेको भए पनि आवश्यक परिस्थिति आएमा सबै विकल्प खुला राखेर अघि बढ्ने संकेत प्रधानमन्त्रीको अभिव्यक्तिबाट देखिएको छ।
