राजनीतिक कोटाबाट नियुक्त ६ देशका राजदूत फिर्ता बोलाइए

काठमाडौँ, सरकारले राजनीतिक कोटाबाट नियुक्त भएका ६ देशका राजदूतहरुलाई फिर्ता बोलाउने निर्णय गरेको छ। केपी शर्मा ओली नेतृत्वको अघिल्लो सरकारले नियुक्त गरेका भारत, अस्ट्रेलिया, श्रीलंका, दक्षिण कोरिया, डेनमार्क र दक्षिण अफ्रिकाका राजदूतहरुलाई फिर्ता बोलाइएको हो।
परराष्ट्र मन्त्रालयका प्रवक्ता लोकबहादुर क्षेत्री पौडेलका अनुसार, फिर्ता बोलाइएका राजदूतहरुलाई एक महिनाभित्र स्वदेश फर्किन पत्राचार गरिसकिएको छ।
अघिल्लो सरकारले ३४ वटा कूटनीतिक नियोगमध्ये १७ स्थानमा राजनीतिक कोटाबाट नियुक्ति गरेको थियो। यसअघि नै केही राजदूतहरुलाई फिर्ता बोलाइएको भए पनि बाँकी रहेका ६ जनालाई अहिले फिर्ता बोलाउने निर्णय गरिएको हो।
सरकारको यो निर्णयलाई कूटनीतिक क्षेत्रमा सुधार र व्यावसायिक कूटनीतिज्ञलाई प्राथमिकता दिने प्रयासका रूपमा हेरिएको छ। सत्ता परिवर्तनसँगै राजदूत परिवर्तन गर्ने अभ्यास नेपालमा नयाँ भने होइन।
यस निर्णयपछि ती देशहरूमा नयाँ राजदूत नियुक्तिको प्रक्रिया अघि बढ्ने अपेक्षा गरिएको छ।